Kallsoyggin sunnanífrá

Kalsoy

Kalsoyggin er ein smøl norður-suðurgangandi fjallarøð og ikki javnt høg.
 
Vestursíðan hevur høg bjørg, brattar líðir og skorar. Eystursíðan er grønari og ikki so brøtt. Á oynni eru 11 dalar. Oyggin verður høgligari longur suður, komið verður.

Kallsoygin norðanífrá

Kallsoyggin hevur eitt ríkt fuglalív

Ein fuglarík oyggj

Í Kalsoynni er nógvur haga- og landfuglur. Norðantil er eisini nógvur bjargafuglur. Plantulívið er áhugavert og fleiri sjáldsamar plantur finnast bæði við Galvin og í norðasta parti av oynni.
Nestindur er hægsta fjall 787 m.

Fýra bygdir

Fýra bygdir eru á Kalsoynni. Sunnast er Syðradalur, síðan Húsar, Mikladalur og norðast er Trøllanes. Allar liggja á eystursíðuni. Á vestursíðuni yvir av Syðradali var fyrr ein bygd, nevnd Blankskáli.
 
Syðradalur og Húsar hoyra til Húsa kommunu, men Mikladalur og Trøllanes eru partur av Klaksvíkar kommunu.
Hagstova Føroya upplýsir í 2015, at seks fólk búgva á Syðradali, 40 á Húsum, 29 í Mikladali og 16 á Trøllanesi.
 
Bilferja siglir fleiri ferðir dagliga millum Klaksvík og Syðradal. Vegasamband er til allar bygdir. Millum Húsar og Mikladal eru 3 tunlar og millum Mikladal og Trøllanes er ein tunnil. Hesin tunnilin hevur ein teym út í Djúpadal, sum liggur millum Mikladal og Trøllanes.

Kallsoyggin er brøtt norðantil

SAM er farleiðin til Kallsoynna

Á Kallsoynni eru nógvir tunnlar

​Villingadalstunnilin frá 1979 er sunnastur og er 1.193 m. Næstur er Ritudalstunnilin frá 1980, sum er 683 m. Triði er Mikladalstunnilin frá 1980, sum er 1.082 m, og fjórði er Trøllanestunnilin frá 1985, sum er 2.248 m. Teymurin út í Djúpadal er 220 m.
 
Minnisvarði frá 2000 yvir sjólátin er á Syðradali, og standmyndin av Kópakonuni frá 2014 er í fjøruni í Mikladali. Smáir skúlabygningar eru í øllum bygdum. Kirkja er á Húsum og Mikladali. Salurin Malta hjá Brøðrunum er í Mikladali. Lítil FSF-leikvøllur er á Húsum og í Mikladali. Campingpláss er í Mikladali. Ein viti er sunnan fyri Syðradal og ein norðast á Kallinum. Gomul mylna og smiðja eru í Mikladali. Felagshús eru á Húsum og Mikladali.
 
Smoltstøð er í Knúsdali millum Syðradal og Húsar, Matsøla er á Húsum, Summarkaffistova er í Mikladali, og Kiosk og Smiðja er á Trøllanesi.

Kallsoyggin sunnanífrá